Acts 10

Pita 'ina ayausa Konilio 'enaya

1Ta 'asa Sisalia 'enaya 'ebweu tai 'ana esana Konilio 'imiyami. Tauna me Loma tolosaiyao 'adi yau analedi 'idi toanugana, boda Itali 'enega, 2ta tauna tai bobo'ana ga ma ina susuyao Yaubada si'amayabena, ta tuta yauna togomabeso 'ilemelemedi ta 'isidasida Yaubada 'ena. 3Ta 'asiyata 'ebweu 'ena 'asuinuwanuwaya, Konilio nina 'ina 'enomata'ita'ita 'enega Yaubada 'ina anilose 'ebweu 'imeema 'enaya, ga 'i'ita 'ai'ailina, ta anilose nina 'igwae, “Konilio!”

4Ta Konilio anilose nina 'iduneduneyena ga ma ina matauta, ta 'igwae, “'Inapwana! To'ase?”

Ta anilose 'igwae, “Yaubada 'imu sidasida be 'imu lema togomabeso 'ediya 'imwalatonina, ga manudi 'inuwa'i'isimu. 5'Enega 'imu toguinuwao 'aidi 'uetunedi be sitatauya Yopa, be Saimoni tauna sieesena Pita si'au'ewenama. 6Ta Pita nina 'ebweu wate Saimoni 'ina anuwa le'awaya 'enaya 'imiyami, ta Saimoni nina 'ina paisewa yobai bwaladiyega gwegwe 'iguiguinuwedi.”

7Anilose nina 'ina ona 'igumwala ga 'itauya, 'enega Konilio 'ina toguinuwao 'ediyega 'eluwa 'ibwauyedi ma ina tolosaiya 'ebweuna, tauna wate Yaubada 'ana to'amayaba sinabwana. 8'Enega anilose 'ina simana Konilio 'iemwasalina sitetoi nidi 'ediya, ga 'ietunedi Yopa 'enaya, ga sitauya.

9Mali 'asiyataya 'asuoleoleya 'etamo sitautauya ga 'asa Yopa siloselabena, ta Pita anuwaya 'imiyami ga 'itu'e etaninaya sabi sidasida. 10'Isidasida ta ma ina botana sinabwana. 'Etamo anuwaya masula sigibugibubu ga Pita 'i'enomata'ita'ita, 11ga galewa 'i'itena 'i'egegena ga 'ebweu yage 'i'itena 'imwa'utama, 'ana 'ita 'atuwa kaleko sinabwana tupitupina ata 'ediyega sietabe mwa'utenama bale'uya, 12ta solanaya mali yobai, be mali yobai, be yobai kawakawalidi, be mali manuwa be mali manuwa. 13'Enega 'ebweu 'enana Pita 'ieonena, 'igwae, “Pita, 'utoolo be yobai nate 'uunudi be 'u'a'a 'amu masula.”

14Ta Pita 'iguitoyasa, 'igwae, “'Inapwana, tuwa, manuna nigeya 'ebweu wate yobai 'eto'etobodana getedi nadigega yada 'enidi.”

15Ta 'enana nina 'iona limana, 'igwae, “Yaubada yobai natedi ni'atu 'igie'esasedi, 'enega geya'abo 'u'awa'awa to'umaliyedi.”

16Yage gete matoi Pita 'ena 'iapwesa, ga 'enana nina matoi nadigega 'ieonena, ga muliyega yage nina 'iila galewaya. 17Ta Pita 'inuwanuwa edaedadama 'aene to'ase 'enomata'ita'ita gete ni'atu 'i'itena, ta tomota 'etoi nidi Konilio 'ietunedima siapwesa anuwaya, manuna ni'atu 'asaya simai ga Saimoni 'ina anuwa tomota 'ediya sienaida. 18'Enega silobena ga anuwa 'awanaya sitoolo ta sibwau, “Gosemao, Saimoni nina sieesena Pita, nate anuwaya 'imiyami, nai nigeya?”

19Ta anuwa nina etaninaya Pita ma ina nuwa edaedadama 'imiyami, ta Yaluyaluwa Tabuna 'ena 'igwae, “Pita, tai 'etoi si'ebe'ebeseyo, ta ni'atu simai ga 'agalauya. 20'Enega 'utoolo be 'umwa'uta 'ediya be ma'emwao watatauya, ta geya'abo 'u'ate'ate sa'ala, manuna 'abo'agu tomota nidi yaetunedima.”

21'Enega Pita nina 'imwa'uta 'ediya ga 'igwae, “'Abo'agu Pita! To'ase manuna wamai?”

22Ta sigwae, “Konilio 'ietunema, tauna 'ima tolosaiyao 'adi toanugana, ta tai palupaluna ta Yaubada 'ana to'amayaba, ta wate me Yudia maibo'adi si'awa tai bobo'anena, ga 'ana emataluwa 'inonona anilose 'enega, be 'aene 'oyo 'ibwauyeyo tauna 'ina anuwaya, be 'imu ona 'ida nono.”

23'Enega Pita tai nidi 'ibwauyedi, ga anuwa nina 'ena sie'owaga.

'Enega tomwa 'iulisina ga sitoolo ga Pita ma'ediya sitauya, ta 'aidi gosediyao Yopa 'enega ma'ediyao wate sitauya. 24Sitautauya ga mali 'asiyataya siapwesa Sisaliya. Ta gote 'enaya Konilio 'ina susuyao be gosenao 'ibwau egogonedimaya, ga 'ina anuwaya siyamwayamwa.

25'Enega Pita 'ilogedoma anuwaya ta Konilio 'iaapwesa, ga Pita matanaya 'ibe'u sanamwa'uta ga 'ibwagobwago.

26Ta Pita Konilio 'igietoolona, ta 'igwae, “'Utoolo! 'Abo'agu tomotai tuga, nadigega 'oyo.”

27'Enega Pita be Konilio ma'iyana sieonaona, ta silugu anuwaya, ga Pita boda anuwa solanaya 'i'itedi, 28ga 'ieonedi, “'Omi 'abo'ama me Yudia 'ama loina wamwalamwalatoni 'aene nigeya sawesawemaya be 'omi nigeya me Yudia 'ayausimi, nai ma'emao taegosigosiyana, ta sa'i Yaubada ni'atu 'enomata'ite'itega 'ie'itegu be geya'abo 'ebweu tomota ya'awa'awa to'umaliyei. 29'Enega tuta nina Konilio 'ibwauyeguma, nigeya yaguiguitoyasa, ta esi yatagwalegu ga ni'atu yamai. Ta to'ase manuna 'ubwauyeguma?”

30'Enega Konilio 'igwae, “Gete manuna: 'Asiyata ata sigumwala 'ena 'asuinuwanuwaya, nadigega gete tuga sidasida 'ana tuta, 'enega 'igu anuwaya yasidasida Yaubada 'ena, ga 'ebweu tai ya'itena mataguya 'itootoolo ma 'ana 'oama 'esasena. 31Ta 'ieonegu, ‘Konilio, Yaubada 'imu sidasida ni'atu 'inonodi, ta wate 'imu lema gomabeso 'ediya 'inuwa'i'isidi. 32'Enega 'imu 'ali'eiyao 'uetunedi Yopa 'ena be Saimoni 'ubwauyenama, tauna sieesena Pita, ta mali Saimoni 'ina anuwaya, Yopa 'ena le'awaya, 'imiyami, ta mali Saimoni nina 'ina guinuwa yobai bwaladiyega gwegwe 'iguiguinuwedi.’ 33'Enega yalomanini ga 'igu 'ali'eiyao nidi yaetunediwaya ga sibwauyemuma, ta 'utagwalemuya ga 'umai, ga kagutoki. 'Enega gete tuga maibo'ama Yaubada matanaya 'adeli egogonama, be to'ase 'Inapwana 'iloinemuya 'uda eonama, be 'ada nono.” 11:3,13,20,26v19 Gu 11:12v25-26 Et 19:10; Md 4:10

Pita 'ina ona Konilio ma ina bodao 'ediya

34'Enega Pita 'ieonedi, 'igwae, “Ona'ai'aila! Ni'atu nuwagu 'isabwalena 'aene tomota maibo'adi Yaubada matanaya leleleya, ta nigeya me Yudia mamo 'iobobomema, 35ta esi mali sena be mali sena tomoteninao, 'eguma si'amayabena be sibubuna palupalu, 'igwausowala manudi. 36Ta To'etoseyana Yesu, tauna maibo'ada 'ida 'Inapwana, ga Yaubada 'ina tetela bobo'ana Yesu 'i'ebwa'ena, 'abo'ama me Isileli 'ima 'ebe gwausowala manuna. Ta 'omi tetela nina wamwalamwalatoni, 37manuna Yoni tetela nina 'ie'alena Galili 'enega, tuta nina 'iloguguya, ga tomota 'igiebapitaisoedi ga muliyega Yesu tetelina 'i'elelewana Yudia senanao maibo'adi 'ediya. 38Tetela nina 'aene Yaubada Yesu goma Nasaleta 'igiewaiwaiyena Yaluyaluwa Tabuna 'enega, ga 'isakosakowasi ga tomota 'ilemelemedi, ta 'abo yaisigedi Seitani be yaluyaluwa to'umalidi sigiele'oasidiya, Yesu 'igiebobo'anedi, manuna Yaubada 'ina waiwai 'enaya 'imiyami. 39Ta 'abo'ama sa'i Yesu 'ana tosimanao, manuna 'ina guinuwao 'a'itediya Yudia senanao maibo'adi 'ediya be wate Yelusalema 'enaya, ga 'ana 'ebe losalowa kaiwe 'ena situtu epa'iyena ga 'imwawasa, 40ta 'asiyata 'etonina 'enaya Yaubada 'igietoolo limena, ga 'igieapwesena, 41nigeya tomota maibo'adi 'ediya, nate namo 'abo'ama Yaubada 'iesinuwema 'ana tosimanao, 'emaya, ga 'ina toololimana mulinaya 'a'e'ai ta 'anumanuma Yesu nina ma'emai.

42“Ga 'iloinema be tomota 'ediya 'aloguguya 'aene Yaubada Yesu nina 'iesinuwena be 'aene tuta 'ana 'ebe losalowa 'ena tauna bwa'omatana 'ida guinuwa, tomota taudi ni'atu simwawasa manudi, be wate 'abo'ada mayawasida manuda.

43“Palopitao wate lowaenei sigimi simanena 'aene 'eguma yaisigedi Yesu 'ena siemiemisa, 'idi loegesiyao Yaubada 'ida nuwataudi, Yesu tauna 'ana esanega.”

Yaluyaluwa Tabuna 'imwa'uta taudi nigeya me Yudia 'ediya

44Pita 'etamo 'ionaona ga Yaluyaluwa Tabuna 'imwa'uta taudi sienoenono 'ediya, 45ga mali 'enana be mali 'enana 'ediyega sionaona, ta Yaubada situputupu, ta me Yudia taudi Yesu 'ana toemisao nidi, Pita ma'enao Yopa 'enega simaiya, sinuwaowana, manuna si'itena Yaubada ni'atu Yaluyaluwa Tabuna 'i'ebwaya taudi nigeya me Yudia 'ediya.

'Enega Pita 'ieonedi, 'igwae, 47“Gosegwao! Wa'ita! Yaluyaluwa Tabuna ni'atu si'ewena, nadigega lowa 'abo'ada. 'Enega nigeya sawesawenaya 'idi bapitaiso bwasiyega ta'etobode, aga?” 48'Enega Pita nina 'iloina be To'etoseyana Yesu 'ana esanega sida bapitaiso, ga muliyega tomota nidi Pita sisidena be 'aina 'asiyata wate ma'ediya sida miyami, ga 'itagwala.